Philipp Heinrich Erlebach (* 25. Juli 1657 in Esens/Oostfreesland, † 17. April 1714 in Rudolstadt (Döringen)) weer een Komponist ut de Tiet, de Barock nöömt wurrn is.
Sien Utbilden hett he wohrschienlich an de Oostfreeschen Hoff in Auerk kregen, wiels sien Vader dor all as Hoffmusiker anstellt weer. De Verwandtschop van dat Herrscherhuus Cirksena mit de döringsche Residenzen hebbt woll dorto bidragen, dat he een Anstellung an’t Hoff van de Graf Albert Anthon von Schwarzburg-Rudolstadt kregen hett, wor he denn 35 Johr lang arbeit hett.
In disse Tiet hett he de lüttje Residenzstadt to een Zentrum för dat musikalsche Leben maakt. Sien över 1000 Kompositschonen bestunnen ut Orchester- und Kammermusik, Opern, Kantaten un Oratorien. To sien Tiet weer he een van de bedüüdenst Komponisten.
Sien Wittfru Elisabeth Catharina hett nah sien Dood de musikalsch Nahlass an de Rudolstätter Hoff vermaakt. De gröttste Deel van sien Kompositschonen is aber 1735 bi een Brand van dat Slott in Rudolstadt mit afbrennt un Erlebach is musikalsch dornah meest vergeeten wurrn. Sien musikalsch Arv wurrd hüdtodag in Esens (dor is ok een Straat nah hüm nömt wurrn) un in Rudolstadt uprecht hollen. Etwa 70 van sien Kompositschonen sünd bi dat Füer domals överbleben, deelwies aber blots handschriftlich.
In sien letzt Johren hett he meest as Musikschoolmester arbeit.